Kiñeke levita sacerdote ngenolu femkefuy fillke küdaw ti ngillatuwe ruka mew, kiñeke soltaukülekefuyngün. Tüfa engün adniefeyew ti longkolelu ti ngillatuwe ruka mew. Kiñe wentru mülekefulu feychi antü mu, Filón pingekefuy, feypi ñi chumkefel tüfachi pu soltau: “Kiñeke tüfachi pu soltau mülekeyngün tati konpupeyüm che ñi adnieal iney ñi konpual ka iney tañi konpunoal. Kakelu soltau mülekeyngün ponwi ngillatuwe ruka mu, itrotripa tati doy yamfal ngillatuwe mu. Femngechi katrütukefingün ñi kon-noal tati kon-noafelchi che. Kakelu soltau miyawkeyngün tati ngillatuwe ruka mu ñi kuñiwtukuafiel, kiñeke miyawkeyngün antü mu, kakelu pun mew”.

Tüfachi pu soltau küdawelkefi tati pu longkolechi judio. Tati pu romache elukelafuy pu judio ñi yenieal fütrake cuchillo, welu tüfachi trokiñ soltau müten elungekefuy ñi yenieal.

Feychi antü ñi presungen ta Jesus, kidu feypi: “Fill antü ta kimeltumekeken ta ngillatuwe ruka mew, welu turpu presumukelafun” (Mat. 26:⁠55). Feymu ti adümuwün wentru Joachim Jeremias pingelu, feypi: ‘Ñi feypin ta Jesus feychi antü presungelu, pengeli ñi rüf mülekefel soltau tati ngillatuwe ruka mu’. Feychi wentru ka feypi pu soltaukülefulu ti ngillatuwe ruka mu, dew eluwfuy ñi presuntukuafiel ta Jesus (Juan 7:⁠32, 45, 46). Rupalu chi antü, tati longkolechi soltau ka tañi trokiñ weychafe engün werküngey ñi küpalafiel Jesus tañi pu inanieetew chew ñi trawüken pu longkolechi judio. Ka tüfachi pu soltau peno wingüdentufi ta Pablo wekuntu ngillatuwe ruka mew (Hecho 4:⁠1-3; 5:⁠17-27; 21:⁠27-30).