Лави гәбиләсинин каһин олмајан үзвләринин иҹра етдији ишләрдән бири бир нөв полис ишинә бәнзәјирди. Онлар бу иши мәбәд рәисләринин нәзарәти алтында иҹра едирдиләр. Јәһуди јазычысы Филон бу кешикчиләрин ишләрини белә тәсвир етмишди: «Онлардан [лавилиләрдән] бәзиләри мәбәд әразисинин ҝиришиндә, бәзиләри исә [мәбәд әразисиндә], мүгәддәс мәскәнин гаршысында кешик чәкирдиләр. Онлар нәзарәт едирдиләр ки, иҹазәси олмајан кәс, һәтта сәһвән белә ора ҝирмәсин. Бәзи кешикчиләр мәбәд әразисинин әтрафында дөврә вурараг, нөвбә илә ҝеҹә-ҝүндүз кешик чәкирди».

Кешикчиләр Синедрионун табелијиндә иди. Рома һөкумәти јәһудиләр арасындан јалныз онлара силаһ дашымаға изин вермишди.

Јоаким Јеремиас адлы алимин сөзләринә әсасән, «Исаны һәбс етмәјә ҝәләнләр чох еһтимал ки, мәбәд кешикчиләри иди, әкс һалда, Иса онлара “һәр ҝүн мәбәддә отуруб вәз едәндә мәни һәбс етмирдиниз” демәзди (Мәт. 26.55)». Бу алимин фикринҹә, бундан бир мүддәт өнҹә Исаны һәбс етмәк истәјәнләр дә мәбәд кешикчиләри иди (Јәһ. 7:32, 45, 46). Башга бир вахт кешикчиләрә вә онларын рәисләринә әмр олунмушду ки, Исанын шаҝирдләрини тутуб Синедрионун өнүнә ҝәтирсинләр. Еһтимал ки, һәвари Булусу да сүрүјүб мәбәддән чөлә чыхаран мәбәд кешикчиләри олмушду (Һәв. 4:1—3; 5:17—27; 21:27—30).