Sam laen blong Livae we oli no pris oli mekem wok olsem ol polis. Kapten blong haos tempol nao i bos blong olgeta. Man Jiu ya Filo, we i raetem ol buk, i tokbaot wok blong ol polis ya, i se: “Sam long olgeta [ol laen blong Livae] oli gad long ol get blong kam insaed long eria blong haos tempol. Sam narafala, oli stanap long fored blong doa blong go insaed long haos tempol, blong blokem eni man we i no gat raet blong go insaed. Sam polis oli wokbaot raon long eria blong tempol blong gad long hem. Samfala oli wok long dei, mo sam long naet.”

Kot ya Sanhedrin i save askem long ol polis blong oli givhan long hem. Hemia wan grup nomo blong ol soldia blong ol man Jiu, we gavman blong Rom i letem olgeta oli karem naef blong faet.

Joakim Yaremias, we i wan man blong stadi, i talem se: “Taem ol polis oli kam blong arestem Jisas, hem i askem long olgeta from wanem oli no bin arestem hem taem hem i stap tij insaed long haos tempol (Mat. 26.55). Jisas i no save talem olsem sipos ol polis ya oli no polis blong haos tempol.” Joakim i ting se olgeta tu we oli kam blong arestem Jisas long wan narafala taem bifo, oli ol polis blong haos tempol. (Jon 7:32, 45, 46) Biaen, kot ya Sanhedrin i sanem sam polis wetem kapten blong olgeta, blong oli tekem ol disaepol blong Jisas oli kam stanap long fored blong kot ya. Mo tu, i luk olsem se ol polis ya nao oli pulum Pol i go afsaed long haos tempol.—Wok 4:1-3; 5:17-27; 21:27-30.