Bone béziñe ya mvoñe Lévi be nji be beprêtre be mbe be bili mimbe’e mife, ane wu ya bo bezimbi ya temple. Bezimbi bete be mbe éjôé évete ya temple si. Philo, mone Juif a ntili bekalate, a kobô ajô ésaé bezimbi bete a jô’ô na: “Belévite béziñe ya été be mbe be ba’ale’e anyiine mimbé ya temple, vôme Bejuif be mbe be nyiin. Ba bevo’o ki be mbe be ba’ale zene ya vôm a ne étyi asu na te môt a ve’ele kobe zen, a ke nyiine wôé. Wônaa ba bevo’o ki be mbe be wulu’u mbôma’ane a temple na be ba’ale nye ngume môs, be bo be fola’an.”

Sanhédrin nnye a nga yiane telé bezimbi bete temple. Bejuif bete étame mbe be nga bi ôva’a ngule ya be’e bikpwelé mewosan éjôé Beromain si.

Joachim Jeremias, ñyeme mam éziñ, a jô na: “Nge bôte be nga zu bi nye be nji be bezimbi ya Temple, Yésus a nji ye sili be amu jé be nga kate nye bi éyoñ a mbe a ye’ele’e bôte môs ôse temple (Mt. 26.55).” Môt ate a buni fe na bôte be nga ye taté zu bi Yésus éyoñ ôsu be mbe fe ve bezimbi ya temple. (Jean 7:32, 45, 46) Môs ôfe, Sanhédrin a nga lôm évete ya Temple a bezimbi béziñe na be bi minlôman a zuu nye mie; a ne fe ve ane mbe fe be nga vaa nlômane Paul temple a daa nye nseñ.​—Mam. 4:1-3; 5:17-27; 21:27-30.