Ka ditiko da Israyeli, vaphaxeli votshe va ti huma ka lihundzu la ka Levhi. Kambe hi nga votshe va ka Levhi i nga ti vaphaxeli, ngu toneto vamwani va txi thuma kota maphoyisa. Va txi thangelwa ngu mthangeli wa dithepele. Philo, i ku mzivi wa matimu wa Mjudha a khene: “Vamwani ka [Valevhi] vonevo va ti vekwa matimbani ve mawonelela, vamwani va ti vekwa ngu mndani [ka dithepele] masoni ka wukhalo wo sawuleka ti to ve tsivela vathu ava va belako ti si nga mlayoni, ngu kuphazama mwendo ngu kutimahisa. Vamwani va ti jika-jika hahanze ni wusiko ve wonelela. Va txi ta txitxwa ngu vamwani vo thuma ni mitshikari.”

Maphoyisa yawa ngu ona ma ti kombelwa kuwonelela Sinedriyo. I ti mtxawa wonewo wa Vajudha dwe awu wukoma wa Roma wu nga ti va tumelela ku ve va ni matxhari.

Ngu kuya ngu txigondi tximwani Joachim Jeremias, txi khene: “Mapswi a Jesu mbimo yi va nga ti lava ku mu ñola, o khene ditshiku ni ditshiku ene a ti dithepeleni a txi gondisa ni ku kha ñolwa (Mat. 26.55), ma pfisiseka kwati i di ti to maphoyisa a Dithepheleni ngu ona ma nga ti lava ku mu ñola.” Joachim a tshumela e pimisa ti to ava va nga ti khatile ve ta, ni vona i ti maphoyisa ya dithepeleni. (Joh. 7:32, 45, 46) Mahalamu ni mthangeli wawe ma gwitile me yisa vagondiswa va Jesu ka Sinedriyo. Ti nga maha i di ona mahalamu a dithepeleni aya ma nga humisa mpostoli Paulo hahanze ka dithepele.—Mith. 4:1-3; 5:17-27; 21:27-30.