Gumwe omu mirimo eyi Abaleevi batari abatambi babire nibakora, ni omurimo gw’abapolisi. Bakaba nibebemberwa na kapiteni w’omuri hekalu. Omuhandiki w’Omuyudaaya ori kwetwa Philo akashoborora omurimo ogu babire nibakora, nagira ati: “Abamwe omuri abo [Baleevi] bakaba nibemerera aha nyigi eziri kutaha omuri hekalu, abandi bemerera omu nda, omu misho g’itambiro, kugira ngu bazibire omuntu otahikirire kutahamu, na yakuba akigenderire ninga atakigenderire. Abo barinzi bakaba nibasimburana nyomushana na nyekiro, baguma nibareba.”

Abo bapolisi bakaba batirweho Ishengero Rikuru ry’Abayudaaya. Ni go mahe g’Abayudaaya gonka agu Abarooma babire nibikiriza.

Tukuratize ebi omunyabwenge ori kwetwa Joachim Jeremias yagambire, “ebigambo bya Yesu ebi yagambire abizire kumukwata bwanyima y’okumara izoba ryona nayegesa omuri hekalu konka batamukwate (Mat 26.55), nibyereka ku abo bapolisi bari bo ababire bari kukora omuri hekalu abizire kumukwata ahari eryo izoba.” Ogo muhandiki nambwenu akagamba ku ababire batumirwe kumukwata aha kiro ecabandize, na bo babire bari abapolisi b’omuri hekalu. (Yohaana 7:32, 45, 46) Abo bapolisi hamwe na kapiteni wabo ni bo abatumirwe kureta abegi ba Yesu omu misho g’Ishengero Rikuru ry’Abayudaaya, kandi oku kiri kurebeka, ni bo abayekwatanisize omu kukurura Paulo bakamushohoza omuri hekalu.—Ebyakozirwe 4:1-3; 5:17-27; 21:27-30.