Ekkóch ekkewe chón Lefi esap iir souasor ra wiseni pwal ekkóch wis, áwewe chék ra eáni eú wis usun chék polis. Ra nóm fán nemenien meilapen ewe imwenfel. Ewe soumak re Jus itan Philo a áweweei wisen ekkena polis: “Ekkóch ekkena [chón Lefi] ra wisen túmúnú ekkewe asamen tolong lón ewe leenien imwenfel, ekkóch ra túmúnú [pwelin únúkkún ewe imwenfel] me mwen ewe imwenfel pwe esap wor chón témwáálilong lón. Ekkóch ra rongeló ewe leeni me mammasafichi. A kan wor chón siwiliir lerán me lepwin.”

Án chón Jus we mwichen sou kapwúng mi tekia ra kan angei álillis seni ekkena polis. Ekkewe chék polis a mumu ngeniir me ren ewe Mwúún Rom ar repwe uwou pisekin efeiengaw.

Me ren emén sousile Paipel itan Joachim Jeremias, a áweweei pwe lupwen ekkewe polis ra ló aresini Jesus, a kapas eis ngeniir ika pwata rese aresini atun a asukula aramas lón ewe imwenfel. Itá Jesus esap eáni ena kapas eis ika ekkena polis rese kapachelong lein ekkewe polis lón ewe imwenfel. (Mat. 26:55) Pwal chék ena sousile Paipel a meefi pwe ekkena polis mi mochen aresini I mwen ena fansoun iir pwal polis lón ewe imwenfel. (Joh. 7:32, 45, 46) Lón pwal eú atun, án chón Jus we mwichen sou kapwúng tekia a tinaló ewe meilapen imwenfel fengen me ekkóch polis ar repwe átekinaló ekkóch néún Jesus kewe chón káé mwer. Ese mwáál pwal iir ekkewe polis ra úraawu ewe aposel Paulus seni ewe imwenfel.​—Föf. 4:1-3; 5:17-27; 21:27-30.