A-Levi waze kakapwile ni chiteli cha usasendote, kapwile ni milimo yeka ni yeka, amwe kapwile ni mulimo wa upulisha. Mapulisha jacho te kakwasongwela kuli kapitau wa mu tembele. Umwe Ka-Yunda, mukwa-kusoneka mikanda, avuluka ngwo, Fílon, kanalumbununa mulimo uze apwile nikulinga mapulisha jacho: “Amwe akuli ayo [A-Levi], kapwile ni kumana ku mapito a mu tembele. Akwo te kakukalakala mu chima lia tembele hanga akwike atu waze te katambile kunjila muma musandu. Eka te kakufunga tembele ufuku ni mwalwa. Te kakwasalakana kuli akwo.”

Mapulisha a mu tembele kapwile ni kukalakala chimwika ni Chota cha akwa kuyula A-Yunda. Maswalale wano A-Yunda, e wika atayijile kuli nguvulu wa A-Roma kupwa ni mata.

Mukwa-kuhengwola yisoneko, Joachim Jeremias, kanambe ngwenyi, “maliji waze Yesu ambile muze amukwachile, akwamba ngwo, tangwa ha tangwa kapwile nikuya nikulongesa mu Tembele alioze kakamukwachile (Mateu 26.55), kanasolola pundu ngwo atu waze ejile ni kumukwata kapwile mapulisha a mu Tembele.” Kanawezela nawa ngwenyi, atu waze atumine kukwata Yesu ha chisuho chitangu kapwile mapulisha a mu tembele. (Yoa. 7:32, 45, 46) Mapulisha jacho, e anakatuma nawa hanga akwate tumbaji a Yesu ni kwatwala ku chota cha akwa kuyula A-Yunda, kota nawa e anakatuma hanga ambulumune Paulu haze lia tembele.—Yili. 4:1-3; 5:17-27; 21:27-30.