O jita la bebolo Bonalevi bena ba si ta prisi ba tano̱ ba be̱ne̱, ba ta pe̱ bangame̱n bolea ka polisi. Nika e ta nde owas’a bediedi ba mwaned’a tempe̱l. Philo mutiled’a Bajū mō̱ a tele̱ye̱ ebol’a ba baboledi, mo̱ ná: “Bō̱ babu ba ta ba te̱me̱ o mo̱mbe̱ ka batatedi o bepolo be̱se̱ bato ba tano̱ bingea, bape̱pe̱ oteten a tempe̱l oboso ba wum’a bosangi o jeka be̱se̱ bena ba s’angame̱n o jingea oten. Bō̱ ba ta ba dangwa dinge̱le̱ tempe̱l o tata mo̱, bato te̱ o ńabu ponda, bulu na mwese.”

Mwemba ma bakaisedi bande̱ne̱ mu ta mu bolane̱ yi polisi. O tumba la Bajū, babo̱ buka te̱ nde Roma e tano̱ ńese̱le̱ ná baleye bewesan ba bwemba.

Mubied’a Bibe̱l Joachim Jeremias a tele̱ye̱ ná ponda baboledi ba putedino̱ Yesu, a baise̱ babo̱ ońola nje ba si putedino̱ mo̱ ke̱ e o lee̱ o tempe̱l. Yesu a si wusa baise̱ mi myuedi e be̱ te̱ ná ban baboledi ba si ta ba bolea o tempe̱l ka polisi. (Mat. 26.55) A mo̱nge̱le̱ pe̱ ná ba bena ba tano̱ ba loma o damea Yesu ngedi ni se̱le̱ pe̱ ba ta nde polis’a tempe̱l. (Yohane 7:32, 45, 46) Ombusa ponda baboledi na mwaned’abu ba lomabe̱ o wana bokwedi ba Yesu oboso ba mwemba ma bakaisedi bande̱ne̱, ba no̱ngi pe̱ dongo yen ebe o busane̱ ńamuloloma Paulo o tempe̱l.​—Bebolo 4:1-3; 5:17-27; 21:27-30.