Levifo a wɔnnyɛ asɔfo no, nna wodzi dwuma ahorow pii. No mu kor nye dɛ nna wɔyɛ edwuma dɛ aporisifo. Nna asɔrfi safohen no na ɔhwɛ hɔn do. Jewnyi kyerɛwfo a wɔfrɛ no Philo kãa edwuma a nna wɔyɛ no ho asɛm. Ɔkãa dɛ: “Dɛm Levifo yi, nna wɔma hɔn mu binom kɔweɔn asɔrfi no n’apon ano. Binom so weɔn ɔkwan a wɔfa do kɔ krɔnkrɔn-bea hɔ no. Afei so, sɛ obi nnyi ho kwan dɛ ɔkɔ krɔnkrɔn-bea hɔ a, dɛ nyimpa no nyim anaa onnyim no, nna wɔhwɛ hu dɛ ɔronnkɔ bea a ɔtse dɛm. Bio so, nna binom bɔ asɔrfi no ho aprɔw dze bɔ ho ban. Wɔyɛ dɛm adzekyee nye adzesaa; iyinom pon a, nna binom akɛhyɛ hɔn anan.”

Nna Sanhedrin bagua no tum ma aporisifo yi yɛ edwuma boa hɔn. Nna Jewfo aporisifo yi nkotsee na Rome aban no ma hɔn kwan dɛ wonkura akodze.

Bible ho ɔbemfo Joachim Jeremias kãa dɛ: “Aber a aporisifo yi kɛkyeer Jesus no, ɔkãa dɛ, daa ɔtse asɔrfi mu rekyerɛkyerɛ no, ebɛnadze ntsi na wɔannkyer no? (Matt. 26.55) Sɛ dɛm nkorɔfo yi nnka asɔrfi mu aporisifo no ho a, nkyɛ Jesus rimmbisa hɔn asɛm a ɔtse dɛm.” Dɛm ɔbemfo yi gye dzi dɛ hɔn a mber bi mu wɔsomaa hɔn dɛ wɔnkyɛkyer Jesus no, nna hɔn so yɛ asɔrfi mu aporisifo. (John 7:32, 45, 46) Mber bi ekyir no, Sanhedrin bagua no somaa asɔrfi safohen no nye n’asomfo dɛ wɔnkɛfa Jesus n’esuafo no mbrɛ hɔn. Obotum so aba dɛ, nna asɔrfi mu aporisifo yi ka ho bi ma wosuoo ɔsomafo Paul mu twee no fii asɔrfi hɔ no.​—Andw. 4:1-3; 5:17-27; 21:27-30.