Eeshii waneinnua leviita nnojotkana sacerdootein. Müshiijeseʼe naʼyataain sünain wainma kasa, maʼaka saaʼin waariaa suluʼu tü aʼwaajüleekat. Nia nekiipüʼükai chi sülaülashikai suwaariase tü aʼwaajüleekat. Nüküjain Filón süchiki tü naaʼinrapuʼukat na waariakana suluʼu tü aʼwaajüleekat. Judío chia wayuukai otta ashajüi nia süchiki tü kasa alatüitkat. Anuu nünüiki: «Eepuʼushii na aaʼinmajakana soʼuluʼu tü aʼwaajüleekat, eeshii na yalakana aaʼinmajüin soʼuluʼu tü aʼajüleekat. Tia, suuliajatü shikerojüin wayuu eekai nnojoluin ekerolojotuin chamüin. Eetaashii na waraitakana saʼwai jee shiale soʼukai süpüla naaʼinmajüin tü aʼwaajüleekat. Pachikuatüshii naya».

Waariakana naainnua neʼipajanashii na laülaayuu suluʼukana tü kanüliakat Sanedrín. Nayaʼala neʼe nayakana eʼitaanakana natuma na romaanokana süpüla kaʼapülain naya.

Naashin Joachim Jeremias, wanee wayuu ekirajaakai süchiirua sukuwaʼipa tü Wiwüliakat, nüsakirüin Jesuu na wayuu ataʼülakana nia sünain jamüin nnojoikaʼa nataʼülüin nia paala suluʼu tü aʼwaajüleekat Maleiwa eepuʼule nikirajüin. «Nnojoishiijeʼe nüsakirüin Jesuu naya wayuukana nnojoliirejeʼe nayain napüshi na waariakana suluʼu tü aʼwaajüleekat», müshi Joachim (Mat. 26:55). Naashin Joachim Jeremias, na ataʼüleekana Jesuu paala nayaʼaya neʼe na waariakana suluʼu tü aʼwaajüleekat (Juan 7:32, 45, 46). Mapa, aküjünüsü nümüin chi sülaülashikai suwaariase tü aʼwaajüleekat otta namüin na waariakana namaainjanain na nikirajüinkana Jesuu suluʼumüin tü kanüliakat Sanedrín. Otta eeshiijaʼa nayale na waariakana na ajaraijakana Pablo anuuipaʼamüin suulia tü aʼwaajüleekat (Aluw. 4:1-3; 5:17-27; 21:27-30).