Oĩ vaʼekue umi levita ndahaʼéiva saserdóte ha haʼekuéra oreko vaʼekue ótro traváho, por ehémplo oservi polisíaramo. Haʼekuéra oĩ vaʼekue pe kapitán templopegua poguýpe. Peteĩ eskritór judío hérava Filón omombeʼu mbaʼépa ojapo rakaʼe koʼã polisía. Haʼe heʼi: “Unos kuánto koʼã levita apytégui oĩ vaʼekue de guárdia umi okẽme, umi entradaitépe oikehápe jepi umi hénte. Ótro katu opyta de guárdia pe témplo korapýpe, pe lugár sagrádo renondépe. Haʼekuéra ojasegura ani hag̃ua oike pe lugár sagrádope ni peteĩ ndorekóiva permíso, ni por ekivokasión. Oĩ voi umi oguatáva oikóvo pe témplo jerére oguardia hag̃ua. Haʼekuéra ombaʼapo por túrno ojapo hag̃ua upe traváho de diakue ha pyharekue”.

Koʼã polisía ningo ombaʼapo vaʼekue pe Sanedrínpe g̃uarã. Umi judío oĩva ko grúpope añoite pe goviérno rrománo opermiti vaʼekue oreko espáda.

Peteĩ expérto hérava Joachim Jeremias oexplika haʼéne hague umi polisía templopegua umi ojagarráva Jesúspe, ha upévare haʼe oporandu chupekuéra mbaʼérepa antevéma ndojagarrái raʼe chupe hikuái haʼe oikórõ guare oporomboʼe pe témplope (Mat. 26:55). Jesús ningo noporandúi vaʼerãmoʼã kuri upéva, umi ojagarráva chupe ndahaʼéirire umi polisía templopegua. Upe expérto opensa avei umi anteve oñemondóma vaʼekue ojagarra hag̃ua Jesúspe haʼe hague avei umi polisía templopegua (Juan 7:32, 45, 46). Upe rire, pe Sanedrín omondo pe kapitán templopeguápe ha unos kuánto polisíape ogueru hag̃ua umi apostolkuérape. Ha oiméne umi polisía templopegua avei la ojagarra vaʼekue apóstol Páblope ha tyryryhápe oguenohẽ chupe pe témplogui (Hech. 4:1-3; 5:17-27; 21:27-30).