Dopo to azọngban susu he mẹhe wá sọn hẹnnu Levi tọn mẹ bo ma yin yẹwhenọ lẹ tindo lẹ mẹ, sọgan yin yiyijlẹdo ponọ-zọ́n go. Ogán tẹmpli-ṣọ́tọ lẹ tọn wẹ nọ deanana azọngban ehe. Wekantọ Ju lọ Philo dọ gando azọngban ponọ ehelẹ tọn go dọ: “Delẹ to [Levinu] ehelẹ mẹ nọ nọte to họntonu ohọ̀n lẹ tọn pẹpẹ taidi họ̀njinọtọ lẹ, bọ mẹdevo lẹ nọ nọ̀ [lẹdo tẹmpli lọ tọn] mẹ pannukọn fiwiwe lọ, nado glọnalina mẹhe osẹ́n ma nagbè lẹ nado tafọ finẹ, vlavo sọn ojlo mẹ kavi lala. Mẹdelẹ nọ to lilẹdo tẹmpli lọ pé, bosọ nọ to yede diọ nado ṣọ́ ẹ to okle po ozán po.”

Whẹdatẹn Daho Ju lẹ tọn sọgan biọ alọgọ awhànpa ponọ lẹ tọn ehe tọn. Ponọ Ju ehelẹ kẹdẹ wẹ Lomunu lẹ nagbè nado hẹn awhànfunnu lẹ.

Sọgbe hẹ weyọnẹntọ Joachim Jeremias, “nuhe Jesu dọ nado wọhẹ mẹhe jlo na wle e lẹ, dọ egbesọegbesọ wẹ emi nọ to Tẹmpli mẹ bo nọ to mẹplọn, ṣogan yé ma wle emi (Mat. 26:55), na tindo zẹẹmẹ dogọ eyin ponọ Tẹmpli mẹ tọn lẹ wẹ wle e.” Wekantọ dopolọ lẹndọ mẹhe yin didohlan to ojlẹ de mẹ jẹnukọn nado wle Jesu lẹ lọsu yin ponọ tẹmpli mẹ tọn lẹ. (Joh. 7:32, 45, 46) To nukọn mẹ, ponọ lọ lẹ po ogán yetọn po yin didohlan nado plan devi Jesu tọn lẹ wá Whẹdatẹn Daho Ju lẹ tọn nukọn, podọ e yọnbasi dọ yewlẹ wẹ dọ̀n apọsteli Paulu tọ́n sọn tẹmpli mẹ.—Owalọ 4:1-3; 5:17-27; 21:27-30.