Nitre levita ruäre ñan nämäne sacerdotere ye kisete sribi keta kabre nämäne, ñodre ruäre nämäne guardiare templote. Capitán templote ye nämäne niaratre tuinbiti. Nitre ye nämäne dre nuainne ye Filón ni judío kukwe tikaka käkwe mikani gare: “Ruäre tä jukwe ken ngübabitikäre, mada abokän tä kä terikri santuario känenkri, nitre ñan raba niken kä yekänti ye ketabätäkäre o nane ni ie kä ñaka gare ye rikadre kä yekänti okwä kware ye ñaka mikakäre näin ta, mada abokän tä ngwätere dibire rare kä ye bäre ta niaratre tä ükaninte ño kä ye ngübabitikäre ye ererebätä”.

Guardiatre ye nämäne sribire Sanedrín kräke. Aune Gobran romano nämäne nitre ye aibe tuenmetre jondron rükäre ngwen.

Ni ja tötikaka kri Joachim Jeremias tä mike gare: “Guardiatre käkwe Jesús kani ngite ngwane Jesukwe ngwanintari ietre, ‘¿ti nämä kukwe driere mantre jetebe templote ngwane ñobätä munkwe ñan ti kani ngite?’ Nitre nikani Jesús kain ngite ye ñan guardiatre sribikä templote akräke Jesukwe ñaka kukwe ye ngwandretari ietre” (Mat. 26:55). Kukwe namani bare ye känenkri guardiatre sribikä templote ye arabe tö namani Jesús kai ngite niebare ni kukwe tikaka ne arabe käkwe (Juan 7:32, 45, 46). Ye bitikäre, Sanedrín käkwe capitán aune guardiatre ye juani nitre ja tötikaka Jesukwe ye kain ngite. Aune Pablo nämäne templo bäre ngwane guardiatre ye arabe käkwe kani ngite raba ruin nie (Hech. 4:1-3; 5:17-27; 21:27-30).