Sekeda orang Lewi ke ukai imam bisi pengawa bukai ke sebaka enggau polis. Sida nitihka iring ari kepala orang ke nyaga Rumah Sembiang. Penulis bansa Judah ke benama Philo bisi madah pasal pengawa polis nya. Iya madahka: “Sekeda sida [orang Lewi] nyaga pintu penama ngagai laman Rumah Sembiang. Sekeda nya nyaga ba mua Rumah Sembiang. Sida nentuka semina orang ke patut aja tau tama kia. Sida bejalai ngelingi laman Rumah Sembiang lalu begintir ngereja nya maya siang enggau malam hari.”

Raban Kunsil orang Judah ulih minta bala polis tu nulung sida. Semina raban polis tu ke dikemendarka perintah Rome mai pedang.

Pakar Bup Kudus ke benama Joachim Jeremias madahka, lebuh bala polis nangkap Jesus, Jesus nanya kebuah sida enda nangkap iya lebuh iya benung ngajar ba Rumah Sembiang. (Mat. 26:55) Jesus tentu enda nanya sida baka nya enti sida ukai ari raban polis ba Rumah Sembiang. Jeremias mega ngumbai sida ke deka nangkap Jesus sebedau nya mega raban polis ba Rumah Sembiang. (Jhn. 7:32, 45, 46) Enda lama udah nya, Raban Kunsil nganjung kepala orang ke nyaga Rumah Sembiang enggau sekeda polis ngambika mai bala rasul ngagai sida. Engka raban polis nya mega ke ngirit rasul Paul pansut ari Rumah Sembiang.—SKR. 4:1-3; 5:17-27; 21:27-30.