Tadday ta aru nga trabahu na ari tu papari nga Levita ay magguardia ta templo. I kapitan na templo i mammandu nira. Dineskriba na gumattura nga Judio nga si Philo i trabahu danaw nga guardia: “Karuan taw nga [Levita ira] ay nakapuestu nga magguardia ta puerta na mismu nga pattallungan ira, i karuan gapa ta unag [na templo] ay magguardia ta arubang na santuario tapenu masiguraduda nga awan tu makatallung nga ari mepangngo nga tolay, sinadyada man onu ari. Matturubba ira nga marronda kada aggaw anna gabi, tapenu egga i kanayun nga magguardia ta templo.”

Awayya gapa nga mappoffun i Sanhedrin ta guardia ira. Ira laman nga grupo na Judio i nipamavulun na gobiernu na Roma nga manammi tu armas.

Segun ta iskolar nga si Joachim Jeremias, turi ta inaresto na guardia ira si Jesus, niyavuna nira nu ngatta ariadda yayya inaresto turi ta maddaggun yayya manuddu ta templo. (Mat. 26:55) Ari nakuan yaw nga niyavu ni Jesus nira nu ari ira nga guardia na templo. Mangurug gapa yaw nga iskolar nga danuri guardia nga nadog nga maggafu kani Jesus ta nappasa ay guardia na templo. (Juan 7:32, 45, 46) Nadog i karuan nga guardia na templo anna i kapitadda tapenu iyangeda ta arubang na Sanhedrin i disipulos ni Jesus, anna posible nga ira gabbalaman i nanguggung nga namalawan kani apostol Pablo ta templo.​—King. 4:1-3; 5:17-27; 21:27-30.