Ācɛ ŋma ipɔɔma ku Ulifayi nōó wɛ ācogwɛɛya ŋ ma lɛ uklɔ ɔhá néē gē ya, uklɔ a kē lɛbɛɛka uklɔ ku aupolihi a. Ɔcɛ nōo wɛ otrɛyi ku ācɛ ō leyi kwu agbliihɔ a gē da uwa ɔdā néē gē ya a. Ɔcɛ Ujiyu éyi nōo wɛ ɔcɛ ō ta ɔkpá a kɛla lɛyikwu uklɔ nɛ ācɛ nōo ba nyā gē ya a kahinii: “Ōhī ku ācɛ Ulifayi nyā wɛ ācɛ ō gbo ɔwɛ ku agbliihɔ a. Ācɛ ɔhá gē gbo iyɔbu ku ɛga otiihɔ a. É gē leyi kwɛɛcɛ gɛɛ, o ya ɛɛ ku ɔcɛ duuma néē jɛga lɛ ɔ ō nyɔ ipu ɛga otiihɔ ŋ ma, kóō hii nyɔ gā ipu nu ŋ. É kóō gáā cɛ lɛ ɔcɛ duuma kóō nyileyi gā ipu abɔɔ ŋ. Ācɛ ōhī ku uwa gē yɛ jila agbliihɔ a ta biili, o ya ɛɛ kéē gbo ɔ. É gē yuklɔ nyā ɔgbɔɔgba kwu otu kwu ɛnɔ.”

Ōjila ku ācɛ ō kɛpɔ a lɔfu da aupolihi nyā kéē ta uwa abɔ. Aupolihi nyā wɛ ígwu foofunu ku ācɛ Ujiyu nɛ Igɔmɛnti ku Urom jɛga lɛ uwa kéē bi iyɛfu a.

Ɔcɛ ō klɔcɛ nɛhi lɛyikwu Ubáyíbu néē hi ka Ujoachim Ujeremias a kahinii: “Eko nɛ aupolihi a lɛ Ujisɔsi kwu a, Ujisɔsi da uwa ka ɔdiya ɛɛ néē kwu anuɔ eko nɛ anuɔ yɔ i nwu ɛlā ipu agbliihɔ ɛ̄cī doodu a ŋ ma (Umát. 26.55). Ujisɔsi i géē yɛ i dɔka nyā ŋ, ɔdaŋ ka ācɛ nōo ba nyā i wɛ ipu aupolihi ku agbliihɔ a ŋ.” Ujoachim Ujeremias nyā kē gbɛla duu ka ācɛ nōo gáā kwu Ujisɔsi gbɔbu lɛ eko ɔɔma a, wɛ aupolihi ku agbliihɔ a nɛ. (Ujɔ́n. 7:32, 45, 46) Igbihaajɛ a, ācɛ ō kɛpɔ a gáā lɛ otrɛyi ku acogbaajɛ a mla aupolihi ōhī tɛhɔ kéē gáā lɛ acocɛhɔ ku Ujisɔsi kwu gē lɛ uwa. Ó kē lɔfu wɛ ka aupolihi ku agbliihɔ a wɛ ācɛ nōo pi Upɔlu wɛɛcɛ ŋma ipu agbliihɔ á.—Ācot. 4:1-3; 5:17-27; 21:27-30.