Karaman iti adu a trabaho dagiti saan a papadi a miembro ti tribu ni Levi ket ti panagserbi kas polis. Indauluan ida ti kapitan ti templo. Inladawan ti Judio a mannurat a ni Philo ti trabaho dagitoy a polis: “Nakapuesto ti dadduma kadakuada [dagiti Levita] kadagiti ridaw kas parabantay iti mismo a pagserkan. Dadduma kadakuada ti adda [iti paraangan ti templo] iti sango ti santuario tapno paritanda ti asinoman a di maikari a sumrek, inggagarana man dayta wenno saan. Adda met dagiti agsisinnublat nga agronda iti aldaw ken rabii tapno agguardia.”

Kontrolado ti Sanhedrin dagitoy a polis. Isuda ti kakaisuna a grupo dagiti Judio a pinalubosan dagiti Romano nga agiggem iti armas.

Kuna ti eskolar a ni Joachim Jeremias a “ti imbaga ni Jesus idi naaresto, nga inaldaw a nangisursuro idiay Templo ngem saanda a tiniliw (Mat. 26.55), ket nalawag nga ipakitana a polis iti Templo dagiti napan nangaresto kenkuana.” Patienna met laeng a dagidiay naibaon a mangaresto ken Jesus iti napalabas a gundaway ket polis met laeng iti templo. (Juan 7:32, 45, 46) Idi agangay, naibaon dagiti polis ken ti kapitanda tapno ipanda dagiti adalan ni Jesus iti sanguanan ti Sanhedrin. Mabalin nga isuda met laeng ti nangguyod a nangiruar ken apostol Pablo iti templo.—Ara. 4:1-3; 5:17-27; 21:27-30.