Hkinjawng ni n re ai Lewi masha nkau hta, pyada magam zawn re ai kaga lit ni nga ai. Nawku htingnu a ningbaw ni gaw shanhte hpe lam matsun ai. Dai hpyen bu ni a lit hte seng nna Yuda laika ka sara Hpilo ndai hku ka wa ai: “Lewi masha nkau gaw nawku htingnu na masha pru shang ai shara na chyinghka hta sin ai. Nkau gaw nawku htingnu a shawng hta sin ma ai. Nawku htingnu de shang na ahkang n nga ai ni shang wa ai baw (sh) ndum shami shang hkrup ai baw n byin na matu re. Nawku htingnu hpe kawan hkawm nna sin ai masha nkau gaw, hpung hte hpung shani shana matut manoi sin nga ma ai.”

Sanhedrin tara rung gaw shanhte hpe karum ya na matu hpyen bu ni hpe karum hpyi mai ai. Roma asuya ni gaw, ndai Yuda hpung hpe sha laknak hpai na ahkang jaw da ai.

“Yesu hpe dai hpyen bu ni rim ai shaloi, nawku htingnu kaw Yesu sharin ya nga ai aten hta shi hpe hpa majaw n rim ai lam (Mat 26.55) shanhte hpe Yesu san wa ai. Lama na dai hpyen bu ni gaw nawku htingnu kaw na n rai yang, dai ga san hpe Yesu san na n re” nga nna hpaji du Yoakim Jeremaia sanglang dan ai. Bai nna, shawng kalang hta Yesu hpe rim mayu ai ni mung, nawku htingnu na hpyen bu ni sha re ngu dai laika ka sara kam wa ai. (Yhn 7:32, 45, 46) Hpang e Sanhedrin tara rung gaw, kasa ni hpe shanhte hpang de shaga sa na matu, hpyen bu ni hte hpyen du ni hpe shangun dat ai. Nawku htingnu kaw nna kasa Pawlu hpe karawt shapraw ai ni mung, nawku htingnu na hpyen bu ni sha rai na re.​—Kas 4:1-3; 5:17-27; 21:27-30.