Kes levita ki ka éra saserdóti ta fazeba txeu trabadju na ténplu. Alguns di es éra sima pulísia di ténplu. Es ta sigiba órdi di xéfi di guardas di ténplu. Un skritor judeu ki txomaba Fílon, splika kuzê ki kes pulísia di ténplu ta fazeba. El fla: “Alguns [levita] ta fikaba sakédu na entrada di portons sima porteru, otus ta fikaba déntu [di ária di ténplu], frenti di santuáriu, pa ka dexaba ningen ki ka tinha autorizason poba pé la, mésmu sen intenson ô di propózitu. Inda ten otus ki ta andaba na vólta di ténplu pa protejeba el. Es ta trabadjaba pa turnu, dia ku di noti.”

Pulísia di ténplu ta fazeba kel ki Tribunal más altu di judeus ta mandaba. Es éra úniku grupu judeu ki govérnu di Roma ta dexaba uza arma.

Un studiozu di Bíblia ki txomaba Joaquim Jeremias, splika ma kantu kes guarda prende Jizus, el pergunta-s pamodi ki es ka prende-l kantu ki el staba ta inxina na ténplu. Jizus ka ta fazeba kel pergunta li si kes guarda ka ta fazeba párti di pulísia di ténplu. (Mat. 26:55) Kel mésmu studiozu ta kridita ma kes guarda ki krê prendeba Jizus algun ténpu antis, tanbê éra pulísia di ténplu. (João 7:32, 45, 46 ) Un ténpu dipôs, Tribunal más altu manda kel xéfi di guardas i alguns guarda pa ba buska disiplus di Jizus. Ta parse tanbê ma éra pulísia di ténplu ki rasta apóstlu Polu pa fóra di ténplu. — Atos 4:1-3; 5:17-27; 21:27-30.