Sayi jilevita kexile akunji, exile ni ikalakalu yengi kala o kusidivila kala alangidi mu tembulu. O kabhitangu ka kilangidilu kya tembulu, mwene wexile mu kwendesa o ikalakalu yiyi. O musoneki mukwa Juda, Filo, wa jimbulula o ikalakulu yexile mu bhanga o alangidi: “Sayi Jilevita exile mu kalakala kala alangidi a mwelu, mwexile mu bokwena athu mu tembulu. Akamukwa, exile alangidi moxi a tembulu phala kufidisa athu kubokona mu kididi kikôla, né mwene se mulwelu mba kana. Akamukwa exile munyunga kumbandu ya tembulu phala ku ilanga. Ene exile kudibhinganesa, akamukwa akalakala mu mwanya akamukwa m’usuku.”

O akunji amakota exile ni kutena kwa kubhinga o kikwatekesu kya alangidi yâ. Bhu kaxi ka Jijude, o Nguvulu ya Loma wexile mu kwehela ngó o kibuka kya alangidi a tembulu kwenda ni jixibhata.

O mutokwexi wa Bibidya Joachim Jeremias wa jimbulula kwila, “kyoso alangidi kya kwata Jezú, mwene wa ebhwidisa se mukonda dyahi ka mu kwatele kyoso kyexile mu longa mu tembulu. (Mat. 26:55) Jezú keji bhanga o kibhwidisu kiki se athu ejile ku mu kwata ka tokalele ku kibuka kya alangidi ya tembulu. O mutokwexi wa xikina kwila o athu ayile mu kwata Jezú, kithangana kudima exile we mu kalakala kala alangidi mu tembulu. (Nzwá 7:32, 45, 46) Kupholo o mukunji wadikota wa tumikisa o kabhitangu ka kilangidilu kya tembulu ni alangidi phala kuya kutakana o jipoxolo mutembulu. Yâ nange ene akatula poxolo Phawulu mu tembulu.—Ika. 4:1-3; 5:17-27; 21:27-30.