Леԝийед кӧ кʹаһин нибун щурʹә-щурʹә шьхӧл дькьрьн. Мәсәлә, щабдарикә ԝан әԝ бу, кӧ әԝана нобәдар бун, кʹижана иро әм дькарьн бәрамбәри полиса бькьн. Әԝана бьн рʹебәрийа сәрԝере пʹарьстгәһе бун. Ньвискʹаре Щьһу Филон шьровәкьр, кӧ шьхӧле ԝан нобәдара чь бу: «Һьнәкед жь ԝан [Леԝийа] бәр шемика пʹарьстгәһе дәргәһван бун, һьнәк жи һьндӧре [пʹарьстгәһе] бәр пирозгәһе нобәдари дькьрьн, сәва кʹерʹа изьн тʹӧнә, нәкʹәвә ԝедәре, һәла һе жи һәрге шаш бә. Һьнәк жи дор-бәре пʹарьстгәһе дьчун-дьһатьн, әԝана бәр һәв дьһатьн гӧһастьн, у шәв у рʹож нобәдари дькьрьн».

Щьвина Гьрәгьра дькарьбу жь ԝана аликʹари бьхԝәста. Рʹомайа тʹәне изьн дьданә ԝан Щьһуйа, ԝәки чʹәкед ԝан һәбьн.

Зандар Йоаким Щеремайа дьбежә: «Гьлийед Иса кӧ әԝи нобәдарарʹа гот, йед кӧ һатьн ԝи бьгьрьн, нишан дькьн, ԝәки әԝ нобәдаред Пʹарьстгәһе бун, чьмки Иса жь ԝана пьрси, кӧ чьрʹа ԝана әԝ пʹарьстгәһеда нәгьртьн, нә әԝи һәр рʹож ԝедәре һин дькьр (Мәт. 26:55)». Әԝи зандари баԝәр дькьр, кӧ пешийа ве йәке жи, чахе щарәке нобәдар шандьбун сәва Иса бьгьрьн, әԝана жи нобәдаред пʹарьстгәһе бун (Йуһʹн. 7:32, 45, 46). Ԝәʹдә шунда, Щьвина Гьрәгьра нобәдаред пʹарьстгәһе сәрԝеред ԝанва шандьн, ԝәки шагьртед Иса бьгьрьн у биньн щәм ԝан, у дьԛәԝьмә диса әԝана бун, йед кӧ Паԝлос гьртьн у жь пʹарьстгәһе кʹаши дәрва кьрьн (Кʹар. Шанд. 4:1-3; 5:17-27; 21:27-30).