Varevhi vamwe ava va dilire kukara vapristeli, ngava rugana pontembeli ngovanomeni. Awo ngava kwama mavyukiso gomupitisili govanomeni wontembeli. Mutjangi goMujuda Philo kwa faturura eyi ngava rugana vanomeni owo. Age kwa tanta asi: “Varevhi owo vamwe ngava sikama pomavero gokutwaredesa meharango lyontembeli ntani vamwe pomarungavero gontembeli. Awo ngava divilisa asi kwato ogu va dira kupulisira na hwilira montembeli, nampili kuna lipuka kuhwilira mo. Vamwe ngava likunduruka kevango lyontembeli yipo va zi takamese. Awo ngava li pe marufo gokurugana mutenya ntani nomasiku.”

Vanomeni owo ngava kwama hena mavyukiso goSigongi somasimbi. Kugusa ko vanomeni owo, kwato hena Mujuda lya pulisilire epangero lyoVaroma mokusimba yirwiso.

Mulirongi gumwe gedina Joachim Jeremias kwa tanta asi: “Apa vanomeni owo va kwete Jesus, age kwa va pulire konda zeyi va dilire kumukwata apa nga rongo montembeli kenye ezuva. Jesus ngano kapi ga pulire vagara owo epuro olyo nsene asi kapi va kere vanomeni wopontembeli.” (Mat. 26:55) Mulirongi ogo kwa pura hena asi vantu ava va tumine va ka kwate Jesus komeho zosikando esi nawo kwa kere vanomeni wopontembeli. (Joh. 7:32, 45, 46) Konyima, sigongi somasimbi kwa tumine vanomeni owo kumwe nomupitisili gwawo yipo va ka rete varongwa vaJesus, ntani ayo kumoneka asi vanomeni owo yiwo hena va kokerere Paurusa ponze zontembeli.—Yirug. 4:1-3; 5:17-27; 21:27-30.