Anelevi ana ke bakala anganga ko salu ya mpila mu mpila basalanga. Kimosi muna salu yayi i sala nze makesa. E makesa mama mafilwanga kwa mfumu a makesa ma tempelo. Fílon wa nsoneki wa musi Yuda wayika e salu basalanga e makesa mama. Wavova vo: “Akaka muna yau [Anelevi], basalanga se ayingidi vana mielo mia tempelo. Akaka bakalanga vana kati kwa [yanzala kia tempelo], vana ndambu a fulu kiavauka muna kakidila konso muntu kena yo nswa ko wa lwaka vana fulu kiaki, kiakala kuna lukanu yovo ve. Akaka bayingilanga e yanzala kia tempelo fuku yo mwini.”

Makesa ma tempelo mpe balangidilanga e Mbazi a Nkanu. Yau kaka bavewa o nswa kwa luyalu lwa Roma wa kala ye nsosolo.

Joachim Jeremias wa nsoneki a lusansu wavova vo: “E mvovo mina Yesu kavova muna lumbu kina kakangwa vo e lumbu yawonso yakelenge muna Tempelo yo kunulonga kansi yeno kenunkangi, miadi kala kaka ye nsasa kele vo makesa ma Tempelo kikilu bankanga.” (Mat. 26:55) O nsoneki ndioyu okwikilanga mpe vo awana bateka tumwa mu kwenda kanga Yesu, makesa ma tempelo mpe bakala. (Yoa. 7:32, 45, 46) Kuna kwalanda, e Mbazi a Nkanu yatuma mfumu a makesa ma tempelo kumosi ye ayingidi mu kwenda kanga alongoki a Yesu yo kubatwasa kwa yau. Nanga makesa ma tempelo yau mpe bakoka Paulu wa ntumwa kuna mbazi a tempelo.—Mav. 4:1-3; 5:17-27; 21:27-30.