Umue wa ku midimu ya bungi ivuabu benza kudi bena tshisa tshia Lewi bavua kabayi bakuidi uvua wa kuenza mudimu uvua muenze bu wa bumpulushi. Bavua babalombola kudi mutangidi wa ku ntempelo. Mufundi muena Yuda diende Philo udi umvuija mudimu wa balami aba wamba ne: “Bamue ba kudibu [bena Lewi] badi ku biibi bu balami bimane kamungulu mu bibuelelu, bakuabu munda [mua lupangu lua ntempelo] kumpala kua muaba wa tshijila bua kupangisha muntu udibu kabayi banyishile bua kudiatamu ku bukole anyi kayi mumanye. Banga badi banyungulukaku benda bakombolangana butuku ne munya bua kulamaku.”

Bampulushi abu bavua bambuluisha Tshilumbuluidi tshinene dîba dionso divuabu nabu dijinga. Anu bobu ke bena Yuda bavuabu banyishile kudi bena Lomo bua kuikala ne bia mvita.

Mumanyi kampanda wa malu a mu Bible diende Joachim Jeremias udi uleja ne: ‘Mêyi avua Yezu muambile bantu bavua balue kumukuata a ne: ku dituku ne ku dituku mvua ndongesha mu Ntempelo kanuyi nunkuata (Mat. 26:55) adi umvuika bimpe menemene bikala bavua balue kumukuata abu bikale bampulushi ba ku Ntempelo.’ Mufundi umue umue eu mmumone ne: nansha bantu bavuabu batume kumpala bua kukuata Yezu bavua kabidi bampulushi ba ku ntempelo. (Yone 7:32, 45, 46) Bakalua kutuma balami ne mutangidi wabu bua kukuata bayidi ba Yezu kuya nabu ku Tshilumbuluidi tshinene, ne bidi bimueneka ne: bavua kabidi mu bantu bavua bakokele mupostolo Paulo pambelu pa ntempelo.​—Bien. 4:1-3; 5:17-27; 21:27-30.