Aqeju aj Leví mintiʼ xi qʼoʼn kyoklen te pal, bʼant nim aqʼuntl kyuʼn toj tja Dios ik tzeʼn tuʼn kyok te polisiy. Ateʼtoq toj tkwent nejenel attoq toj tja Dios. Tzaj tchikʼbʼaʼn aj tzʼibʼil te Judea Filón tbʼi, tiʼ kyaqʼun bʼant: «Ateʼ junjun e xqʼuqin ttzi tlamel tja Dios; junjuntl e xqʼuqin tojxi tuʼntzun miʼn kyokx xjal mintiʼ qʼoʼn ambʼil kye ex aʼyeju nya ximen maj kyuʼn tuʼn kyokx. Atzun junjuntl e xqʼuqin tiʼj tja Dios te qʼijtl ex te qonikʼen ex bʼant kyuʼn toj alkyexku ambʼil xi qʼamaʼn kye».

E ajbʼen kʼloj polisiy kye xjal at kyoklen toj Sanedrín. Oʼkx kye polisiy lu xi qʼoʼn ambʼil kye tuʼn tten kyspad tuʼn aj kawil te Roma.

Tqʼama Joachim Jeremias jlu, jun xjal at tojtzqibʼil: «Tej ttzyet Jesús kyuʼn polisiy, tqʼama kye qa kubʼ qeʼ tkyaqil qʼij twitz tpeʼn tja Dios qʼol xnaqʼtzbʼil ex mintiʼ xi kyiʼn te». «Noqwit nya kyuʼn polisiy in che ajbʼen toj tja Dios tzyet Jesús», mintiʼwtlo ttxolil tyol xi tqʼamaʼn kye (Mat. 26:55). Ax ikx tqʼama Joachim qa otoqxi tzʼok tilil kyuʼn polisiy lu tuʼn t-xi kyiʼn Jesús pres (Juan 7:32, 45, 46). Tej tikʼ ambʼil, xi qʼamaʼn te nejenel ex kye polisiy tuʼn t-xi kyiʼn qe t-xnaqʼtzbʼen Jesús kywitz xjal at kyoklen toj Sanedrín. Bʼalo aʼyex polisiy lu i etz jakʼunte apóstol Pablo tiʼjxe tja Dios (Hech. 4:1-3; 5:17-27; 21:27-30).