Tjínkʼa chjota levita xi tsín tsa naʼmi koan tonga tsee xá kisʼenele ya yo̱ngo̱, jolani nga policía koan. Je chjota xi ngʼajko̱le koanni chjota xi síkuinda yo̱ngo̱ jé tsakinyatítjonle je policía. Je chjota judío xi Filón tsakʼin kʼoakitso jme xá xi kisʼin je policía, i kitso: “Tjínkʼa xi ya tsakinyajchxo ya xo̱ntjoale yo̱ngo̱, xi ya tsakinyandai jñani tíjna je ʼNdetsje ánni nga tsín ʼya chjota xi kjaʼaí jaʼasʼenni, kʼoa tjínkʼa xi nichxin kao nitje̱n tsakʼetsomandai nga kisikuinda je yo̱ngo̱ nga̱ tsen tsen tsʼakaole nga jngó jngó kʼiani kisikuinda”.

Policía jebi jé Sanedrín kisixále. Tojé chjota jebi xi kitsjoaʼndele je chjotaxá xi Roma tsakatéxoma nga koan tsakʼa ki̱cha̱.

Je chjota xi Joachim Jeremias tsakʼin i kitso: “Kʼianga kitsoa Jesús je sondado kʼoakitsole ánni nga tsín kʼia kitsoani nga̱ yaani kitsoyantsjai ya nditsinle yo̱ngo̱”. Kʼiatsa tsínlani kisʼe policía alikuijin kʼoakitso je Jesús (Mat. 26:55). Chjota jebi kʼoati kitso nga tijeni je policía xi síkuinda ya yo̱ngo̱ xi koanmele kitsoa tsakai je Jesús nga títjon (Juan 7:32, 45, 46). Nga jeki nichxin, kʼoatsakʼinle je chjota xi ngʼajko̱le koanni chjota xi síkuinda yo̱ngo̱ kao je policía nga ya ngixko̱n Sanedrín katafikao je chjotatjenngile Jesús. Kʼoa tsakui nichxin tojo je policía jebi xi kitsoa Pablo ya nditsinle yo̱ngo̱ (Hech. 4:1-3; 5:17-27; 21:27-30).