Tam ijty nääk ja lebitëty diˈib kyaj tyundë saserdotë, per tyuundëp kanäk nax ja tuunk mä ja templë, extëm nˈokpëjtakëm, tam diˈib tuundë polisiyë. Ets yëˈë ijty tuunkmooyëdëp ja diˈib nyiwintsënˈäjtypyë templë. Filón, tuˈugë judiyë diˈib ijty kyujäˈäyëp tijaty, tnimaytyaˈaky tijaty tyuundë ja polisiyëty, jyënany: “Tam diˈib yajpëjtaktë tëjkˈagëˈëy parë tkuentˈattët ja tëjkˈääw; tam diˈib yajpëjtaktë tëgoty mä yajnidëkë ja lugäärë wäˈätspë parë kyaj alokë pën yˈayoˈoyët; etsë wiinkpëty, yëˈë nyayoˈoy nyanäjxtëp ja templë xëëny koots extëm tyukäˈäjëdë”.

Ja teetywyintsënëty, nan yëˈë ijty yˈamdoowdëbë naybyudëkë ja polisiyëty. Ets ja gobiernë diˈib Roma, yëˈëyë ijty nyasˈijxëp etsë tyäˈädë judiyëtëjk tmëjëdittët ja yˈespäädë.

Joachim Jeremias, tuˈugë jäˈäy diˈib yˈëxpëjkpëtsëëmbyë Biiblyë, tnimaytyaˈaky: “Ko Jesus yajmäjtsy, ta tˈanmääy ja diˈib mäjtsëdë, tiko nety të kyamatsëdë, pes bom bomë nety të yaˈëxpëky mä ja templë”. Tyäˈädë yëˈë yajxon xytyukˈijxëm ko ja polisiyëty diˈibë nety tuundëp mä ja templë, yëˈë myäjtstë Jesus (Mat. 26:55). Joachim Jeremias nanduˈunën jyënany ko ja diˈib ojts tˈokmatsandëbë Jesus nan yëˈë ja polisiyëty diˈibë nety tuundëp mä ja templë (Fwank 7:32, 45, 46). Ok, ta ja teetywyintsën tkajxtë ja diˈib nyiwintsënˈäjtypyë templë mët niduˈuk nimajtsk ja polisiyëty parë nëjkx dyajtsoondë ja Jesus yˈapostëlëty. Ets nan waˈan yëˈëjëtyë tyäˈädë polisiyëty diˈib pawitsy pajëdoty yajpëtsëëmdë ja Pablo mä ja templë (Apos. 4:1-3; 5:17-27; 21:27-30).