Levi iduhuna tataudia haida na dia hahelaḡa taudia, to e karava ḡaukaradia na momo bona edia ḡaukara ta na pulisi ḡaukarana. Idia na dubu helaḡa lohiana ena hahekau henunai e ḡaukarava. Iuda toretore tauna, Philo ese edia ḡaukara na ini e herevalai toma: “Levi taudia haida na dubu helaḡa iduaradia e gimadiava. Haida na dubu vairanai e giniva, unu amo asi edia maoro eiava vareai kava taudia e koudiava. A haida be dubu helaḡa igimana totona e raka heḡeḡeva, bona orea ta ta ai e ḡaukarava dina bona hanuaboi.”

Unu pulisi na Sanhedrin taudia ese danu e noidiava idia bae durudia totona. Roma gavamanina ese gwaumaoro na idia mo e henidia, tuari kohudia bae dogotao.

Aonega tauna ta ladana, Joachim Jeremias na e gwaumu: “Iesu e dabaia tao neganai e gwauraia herevana ese e hahedinaraia ena be ia na dina iboudiai dubu helaḡa ai e hahedibava to se dabaia tao. (Mat. 26:55) Bema pulisi na dubu helaḡa ai asie ḡaukarava Iesu ese una hereva na basinema gwauraia.” Una aonega tauna na e laloava, Iesu e urava bae dabaia tao taudia na una dubu helaḡa ai e ḡaukarava pulisidia. (Ioa. 7:32, 45, 46) Gabeai Sanhedrin taudia ese pulisi mai edia kapten ida e siaidia Iesu ena hahediba na idia dekedia bae hakaudia lao, bona reana unu pulisi ese danu aposetolo Paulo na dubu helaḡa amo e veria lasi.​—Apos. 4:1-3; 5:17-27; 21:27-30