Aina Levi yamwi ataali ya simapepo yaombanga umulimo wa ulinzi nupya yali kwati aakapokola. Yatungululwanga nu mukalamba wa ng’anda ikulu yakwe Leza. Kalemba wa Ayuda Philo walondolwile imilimo ino alinzi yaombanga, watiile: “Aina Levi yamwi yaombelanga pa mpongolo, yauze yaombelanga umu musolo wa mukasi pakuti yasininkizya ukuti wino atazumiliziwa ukwingila umwa muzilo atiingila. Yamwi yazingulukanga icifulo ca ng’anda ikulu yakwe Leza nupya yavwananga ndi papita insita, yaombanga akasanya nu usiku.”

Amu cilye ca Sanihedilini yanenanga alinzi yaa ukuti yayazweko. Yaa ali Yayuda sile yano uteeko wa Ciloma wazumilizye ukuomvya ivyanzo.

Uwasambilila pali Baibo Joachim Jeremias walondolwile ukuti lino alinzi yaa yalemile Yesu, wayuzizye umulandu uno yatamulemile lino wasambilizyanga umu ng’anda ikulu yakwe Leza, Yesu nga atayuzizye vivyo ndi cakuti yataombelangapo. Uwasambilila kwene wii welenganyanga ukuti yano yalondanga ukulema Yesu pa nsita yuze nayo kwene yali alinzi. (Yoa. 7:32, 45, 46) Lino papisile insita, amu cilye ca Sanihedilini yatumile alinzi yaa ni ntunguluzi yao ukuyalema atumwa yakwe Yesu, nupya yafwile ali yano yafumizye nu mutumwa Paulo umu ng’anda ikulu yakwe Leza.—Mili. 4:1-3; 5:17-27; 21:27-30.