Juon iaan jerbal ko rellõñ an ro jãn bwijjin Livai me rar jab bũrij, ej rar ejaake juon kumi me rar kõm̦m̦ani jerbal ko me reitõn ãinwõt jerbal ko an bwilijmããn̦ ro. Karõk in ekar itok jãn eo ej kapen in tampel̦ eo. Juon ri-jeje etan Philo me ej juon ri-Ju, ear kõmel̦el̦eiki jerbal ko an opija rein im ba: “Jet iaan ri-Livai rein rar ri-lale kõjãm ilo jikin del̦o̦ñ ko, jet rar jerbal ilowaan tampel̦ eo im̦aanin jikin eo eokkwõjarjar ñan kõjparok an ro me ejjel̦o̦k aer mãlim ñan del̦o̦ñ ilowaan, ekoba ro ejjel̦o̦k aer jel̦ã bwe rejjab maroñ del̦o̦ñ. Jet rar etetal ipel̦aakin tampel̦ eo im waje. Im raan im boñ ri-waj rein rar kotaik doon ilo aer waj.”

Ri-ekajet ro ilo im̦õn ekajet eo el̦ap an ri-Ju ro, remaroñ kajjitõk ippãn bwilijmããn̦ rein ñan jipañ er jabdewõt iien. Ede in kumi in ri-Ju ro me kien eo an Rom ear kõtl̦o̦k aer bõk kein jerbal ko ippãer ãinwõt jãje ak men ko ãierl̦o̦kwõt.

Rimmãlõtlõt eo etan Joachim Jeremias me ej katak kõn kobban Baibõl̦ ej ba bwe ke bwilijmããn̦ rein rar kalbuuji Jesus, ear kajitũkini er etke rar jab kalbuuji ke ear katakin armej ro ilo tampel̦ eo. Jesus eban kar kwal̦o̦k kajjitõk in el̦aññe bwilijmããn̦ rein rar jab m̦õttan bwilijmããn̦ ro an tampel̦ eo. (Matu 26:55) Ejja rimmãlõtlõt in wõt, ej tõmak bwe ro kar jilkinl̦o̦k er bwe ren kalbuuji Jesus ilo kar juon iien m̦oktal̦o̦k, rar bar bwilijmããn̦ in tampel̦ eo. (Jon 7:32, 45, 46) Tokãlik kar bar jilkinl̦o̦k opija ro ippãn kapen eo aer ñan bõkl̦o̦k ri-kal̦oor ro an Jesus ñan im̦aan ri-ekajet ro ilo im̦õn ekajet eo el̦ap an ri-Ju ro, im ejjel̦o̦k pere bwe rein rar bar bõk kun̦aaer ke kar iperl̦o̦k rijjilõk Paul jãn tampel̦ eo.​—Jrb. 4:1-3; 5:17-27; 21:27-30.