Тахилч биш левичүүд олон үүрэг гүйцэтгэдэг байсан. Нэг үүрэг нь харуул буюу цагдаагийн ажил юм. Тэд сүмийн харуулын даргад захирагддаг байжээ. Иудейн зохиолч Фило цагдаагийн үүргийг тодорхойлж бичихдээ «Тэдний [левичүүдийн] зарим нь хашааны хаалгануудын дэргэд харуул хийдэг, зарим нь [сүмийн хашаан] дотор ариун газрын өмнө зогсоод зөвшөөрөлгүй хүмүүс санаатай болон санамсаргүйгээр ариун газар орохоос сэргийлдэг байжээ. Мөн эргэн тойронд нь өдөр, шөнийн ээлжинд гарч эргүүл хийдэг хүмүүс ч байв» гэжээ.

Цагдаа нарыг Иудейн Зөвлөл хариуцна. Ромын засгийн газар зөвхөн цагдаа нарт зэвсэгтэй явахыг зөвшөөрчээ.

Ёаким Еремиас гэдэг судлаач: «Өдөр бүр Сүмд сургаал зааж байхад минь та нар намайг бариагүй гэж Есүс баривчлагдах үедээ хэлдэг (Мат. 26:55). Баривчлахаар ирсэн тэр хүмүүс Сүмийн цагдаа нар байж таарна. Тийм учраас энэ үг маш ойлгомжтой байна» гэж хэлжээ. Урьд нь Есүсийг баривчлахаар ирж байсан хүмүүс нь бас л сүмийн цагдаа нар байсан гэж энэ судлаач үзжээ (Ёох. 7:32, 45, 46). Хожим нь Иудейн Зөвлөл элч нарыг авчруулахаар сүмийн харуулын даргыг хэдэн харуултай явуулсан. Элч Паулыг сүмээс чирч гаргасан хүмүүс нь мөн л сүмийн цагдаа нар байсан бололтой (Үйлс 4:1–3; 5:17–27; 21:27–30).