Awina Levi wamwi wano watalinji awasimapepo wapilwe imilimo yinji iya kuwomba, ndi vino ukuwomba wupolisi. Wa-a wapolisi watungululwanga ne songo wa polisi uwa pi tempile. E kalemba umuYuda e Philo walondolozile imilimo yimwi yino wapolisi wawombanga ukuti, “Wamwi pe wa-a [Awina Levi] wimililanga pa milyango ya pa mpongolo, wanji wacinjililanga apakupelela inzuwi pa kuti wano watazumilizizwe watapalamilako. Ne wanji walondanga umusumba umusanya nu wusiku.”

Icilye ca Sanhedrin cawomvyanga sana wa-a wapolisi. Swinya wanye wa-a awaYuda awano uwuteko wa ciRoma wapile insambu zyakusenda ivyanzo.

Ukulingana na wino wasambilila sana e Joachim Jeremias walanzile ukuti, amazwi yano e Yesu walanzile pano iwumba lya wantu lyayile mukumulema aya kuti, “cila wanda mwi tempile nawizyanga nu kusambilizya lelo nanti kuti mundeme” (Mat. 26.55), yakalanjizya ukuti wano wayile mukumulema wafwile walinji awapolisi wa pi Tempile.” E kalemba umuli wenganye walanda nu kuti cikaloleka ukuti wa polisi wa pi tempile awano walondanga ukulema Yesu na pa muku wa kutalicila. (Yoha. 7:32, 45, 46) Awano ni cilye ca Sanhedrini catumile ukuya mukuleta awasambi wano wawizyanga mwi tempile, swinya wafwile awano walemile ne Paulo ukufumya mwi Tempile nu kumutwala pa londe.—Imili. 4:1-3; 5:17-27; 21:27-30.