Seki levitas akin amo katkaj tiopixkamej kichiuayaj tataman tekimej itech templo, kemej tajpiaskej. Kinixyekanaya tayekankatajpixkej itech templo. Tajkuilojkej judío Filón kijtoj toni tekimej kichiuayaj: “Sekin tajpiaj itech puertas; oksekin tajpiaj iixpan santuario. Kiitaj maj amo kalakikan itech santuario akin amo kinnamiki, maski mopoloskej. Oksekin tachixtinemij itech nochi templo uan mopapatatiyouij tonayan uan youak”.

Akin moajsiaj itech Sanedrín kiniluiayaj nejin tajpianij toni kichiuaskiaj. Akin tekiuajtiaj Roma kikauayaj maj sayoj nejin tajpianij kipianij se espada.

Tajkuilojkej Joachim Jeremias kijtoua ke keman tajpianij kikitskijkej Jesús, yejua kintajtanij keyej amo kikitskijkej keman tamachtiaya itech templo. Jesús amo kintajtaniskia nejon komo nejin tajpianij amo yeskiaj akin tajpiayaj itech templo (Mat. 26:55). Nejin takat no kinemilia ke akin achto kintitankaj maj kikitskitij Jesús no katkaj akin tajpiayaj itech templo (Juan 7:32, 45, 46). Satepan, akin moajsiaj itech Sanedrín kititankej tayekankatajpixkej uan seki tajpianij maj kinkitskitij itatitaniluan Jesús. Xa no yejuan akin kititilatstiyajkej Pablo keman kikixtijkej itech templo (Hech. 4:1-3; 5:17-27; 21:27-30).