Omunye wemisebenzi yamaLevi ayengasibaphristi wawuyikuba ngamapholisa. Ayekhokhelwa ngumphathi wethempeli. Umlobi ongumJuda okuthiwa nguPhilo ulandisa ngemisebenzi eyayisenziwa ngamapholisa la. Uthi: “Amanye amaLevi la alinda eseminyango abantu abangena kuyo nxa besiya egumeni lethempeli. Amanye alinda ephambi kwendawo engcwele. Aba leqiniso lokuthi akulamuntu ongena endaweni engcwele yena engavunyelwa, kungelani lokuthi ungena ngabomo kumbe ngephutha. Amanye ayabe ebhodabhoda elinde ithempeli njalo asebenza entshintshana ubusuku lemini.”

ISanihedrini yayingawacela amapholisa la ukuthi ayincedise. Amapholisa la yiwo wodwa amaJuda ayevunyelwa ngamaRoma ukuthi athwale izikhali.

Isikhwicamfundo okuthiwa nguJoachim Jeremias sachasisa ukuthi ngesikhathi amapholisa ebopha uJesu wawabuza ukuthi kungani engazange ambophe lapho efundisa ethempelini. Saphinda sathi uJesu wayengeke awabuze umbuzo lo aluba ayengayisiwo mapholisa ethempeli. Isikhwicamfundo lesi sikholwa ukuthi labanye ababeke bathunywa ukuthi bayebopha uJesu babengamapholisa ethempeli. (Joh. 7:32, 45, 46) Ngokuhamba kwesikhathi umphathi wethempeli kanye lamapholisa bathunywa ukuthi bayebopha abafundi bakaJesu babuye labo eSanihedrini. Kumele ukuthi yiwo futhi amapholisa ethempeli ahudulela umphostoli uPhawuli phandle kwethempeli.—ImiSeb. 4:1-3; 5:17-27; 21:27-30.