Varevhi vamweni vacaingepi vapiri vaita mabasa amweni, akadari inga kuva murindiri wo themberi. Ivona vaipuwa ndhungamiriro ngo mutungamiriri wo themberi. Umwe mutari wo Cijudha anodanwa Philo wakasanangura basa raiithwa ngo varindiri ava, paakati: “Varevhi vamweni vaingwarira musuvo wainghwina vandhu vaienda mu themberi. Vamweni vangwarira pa mangwiniro o nyumba ya Mwari. Vamweni vainga ngo mukati mo themberi pa mberi po ndau yakacenesesa. Ivona vairambisa mundhu ariwese acikazivi kutendehwa kunghwina, pikija kucika ndauyo acikazvizivi. Vamweni vaingwarira ngo kunja ko themberi zve vaicinjana no vamweni, usiku no masikati.”

Sinedhriyo ndiyona yaikumbira besero ku varindiri ava. Vajudha ava ndivona basi vaitendehwa ngo utongi wo Ciroma kuti vagare no nvuti.

Mukuzwirana no umwe mujiji anozwi Joachim Jeremias wakasanangura kuti: “Varindiri povakasunga Jesu, iyena wakavavhunjisa kuti ngenyi avazivi kumusunga paingaya ecijijisa mu themberi (Mateu 26:55), Jesu acaizoitepi muvhunjo uu kudari varindiri ava avacaishanda mu themberi.” Mutari wondhowo, anotenda kuti vaya vakatumwa koosunga Jesu, vaingazve varindiri vo mu themberi. (Johani 7:32, 45, 46) Pakufamba ko nguva, Sinedhrio yakatuma mutungamiriri wo themberi no varindiri vamweni kuti vaviise vajiji kovari. Kangaije vaingazve varindiri vo themberi vakabudisa mupostori Pauro kunja ko themberi.—Maitiro o Vapostori 4:1-3; 5:17-27; 21:27-30.