Alevi akina yahaari anamukucho yaahikhalano mirici mikina, hiiha ntoko orumeela ntoko mapilisa. Awo yaahooleliwa ni mutokweene a Empa ya Muluku. Mulipa oorepa miyaha sa Ayuta, Filo onnathariha miteko sa mapilisa: “Akina a [Alevi] yaala yeemela va mikhora waavoloiwavo ntoko alipeleli a mikhora. Akina yaakhala mpuwa [wa empa], ohoolo wa santuwariyu, nave awo yaanahiiha wi muchu ohilamuleliwe ahinyikale vaavale, moohiphwacha moolakelela naari hooye. Akina yaaneeceeca moorukurerya mwa Empa ya Muluku nave yaanaraceelana olipelela ohiyu ni othana.”

Mapilisa yaakhala ooreheryeya wi ekhaviherye o Sineetriyu, nave naari nikhuuru nimoharu na Ayuta neemereryiwa ni Aroma okhalano kapuchi.

Mwawiiwanana ni mulipa oohuserya Joachim Jeremias, “masu Yesu aalonceiye wa yaawo yaaruule omphara, wi nihiku ti nihiku aakhala mu Empa ya Muluku ahusihaka nave ehimphara (Mat. 26.55), enniiwexexeya wi yaari mapilisa a Empa ya Muluku yaaruule omphara.” Mulipa oohuserya mmohamoha onneemererya wi alopwana yaawo yaarumihiwe mmahiku muculi wi emphare Yesu yaaritho mapilisa a empa ya Muluku. (Yoh. 7:32, 45, 46) Ohoolo waya, Sineetriyu aahimuruma mutokweene a Empa ya Muluku vamoha ni alipeleli wi yaaruuhe oohuserya a Yesu. Nave akhweya yaari mapilisa a Empa ya Muluku yaawo yaamukumihenrye murummwa Paulo vaate wa Empa ya Muluku.—Saw. 4:1-3; 5:17-27; 21:27-30.