Sekimej levitas akin xteopixkej katkaj kichiuayaj miyek tekitl ipan teopan, sekimej tekitiyaj ken “policías”. Yejuamej kipiayaj se “intlayekankau”. Tlajkuilojketl judío Filón okijto tlenon kichiuayaj yejon policías, okijto: “Sekimej nemij ipan puertas niman ompa tlajpiyaj; oksekimej nemij tlaijtik, ne ixpan santuario, ijkon kitaj maka makalaki akin xkinamiki kalakis noso akin san kalakisneki pampa nopopoloua; oksekimej kiyeualojtinemij teopan ika tlayoua niman ika tonajli, yejuamej ikimatstokej kemanon ontlajpiyaskej”.

Sanedrín kinnauatiaya yejuin policías. Niman san yejuin policías judíos ueliskiaj kimitkitinemiskej espadas pampa ijkon otlanauatijka tekiuaj itech Roma.

Ixtlamatki Joachim Jeremias okiteneuj kenon Jesús okimixkoijli yejon tlakamej akin okajsikej niman ijkon kitsakuaskej. Jesús okimijli yejuin tlakamej ika yejua mojmostla temachtiaya ikiyauak teopan niman nion xokajsikej. ¿Tlenon techasikamachiltia yejuin? Ika nemiyaj policías akin ueliskiaj kitsakuaskej Jesús (Mat. 26:55). Yejuin ixtlamatki noijki kijtoua ika san no yejuin policías yokiyejyekojkaj kajsiskej Jesús (Juan 7:32, 45, 46). Ipan okse tonajli, yejuin policías niman “intlayekankau” okinnauatijkej makinuikakan inomachtijkauan Jesús ixpan Sanedrín. Kanaj noijki yejuin policías okajsikej Pablo ijkuak nemiya ikiyauak teopan (Hech. 4:1-3; 5:17-27; 21:27-30).