Ma e tau tagata he magafaoa Levi ne nakai putoia ke he tau gahua ekepoa, taha he tau gahua loga ne taute e lautolu ko e fakatū e matakau ne tuga e kau leoleo. Taute e mena nei i lalo he takitaki he faituga. Ko e tagata tohia Iutaia ko Philo ne fakamaama e matagahua he tau leoleo nei: “Falu he [tau Levi] nei ne leoleo e tau gutuhala ne huhū atu ke he faituga. Falu ne leoleo i mua [he faituga]. Ne eketaha a lautolu ke puipui e faituga ke he tau tagata ne o atu pulenoa po ke o atu hehē ke he faituga. Falu ne o viko he matakavi he faituga ke leveki ai, ne gahua fakafetokaki a lautolu he aho mo e pō.”

Ko e kau leoleo nei ne gahua ma e Saneheturini. Ko e matakau leoleo Iutaia nei ni ne fakaatā he tau Roma.

Talahau he pulotu ko Joachim Jeremias, “He tau kupu ha Iesu ne talahau he magaaho ne tapaki a ia, ko e tau aho takitaha ne nofo a ia he Faituga ke fakaako ne nakai tapaki a ia (Mata. 26:55), kua maama mitaki e kakano ane mai ko e tau leoleo he Faituga ne o mai ke tapaki a ia.” Ko e tagata tohia ia foki ne talitonu ko e tau tagata nei ne fakafano atu ke tapaki foki a Iesu he taha magaaho kua mole. (Ioane 7:32, 45, 46) Ne fekau e tau leoleo mo e takitaki ha lautolu ke o atu ke tapaki e tau tutaki ha Iesu mo e tamai ki mua he Saneheturini, ti liga ko lautolu foki ne putoia ai he magaaho ne toho mai e aposetolo ko Paulo ki fafo he faituga.​—Gahua 4:1-3; 5:17-27; 21:27-30.