Omunye wemisebenzi eminengi ebeyenziwa malunga wekoro yamaLevi ungafaniswa nokusebenza njengamapholisa. Lokhu bebakwenza bangaphasi kwelawulo lakakapteni wethempeli. Umtloli omJuda uhlathulula imisebenzi yabonogadaba wathi: “Abanye babo bajama emnyango bagade, abanye bajama ngaphambi kwethempeli bona bavimbele nanyana ngubani ongakavumeleki bona angene, kungakhathaliseki bona unqophile namkha awa. Abanye bakhambakhamba ngaphandle kwethempeli, badlhegane, abanye bangena ebusuku, abanye emini.”

Amapholisa la bekajama ngaphambi kweSanhedrini. La bekungiwo kwaphela amabutho wamaJuda ebewavunyelwe maRoma.

Ngokwesazi uJoachim Jeremias wathi, “Amezwi kaJesu awakhuluma nabambophako nakathi mihla namalanga bekahlala ethempelini afundisa, kodwana akhenge bambambe (Mat. 26:55), azwisiseka ngathi amapholisa wethempelini ngiwo eza azombopha.” Umtloli ofanako ukholelwa ukuthi labo abathunyelwa bona bayokubopha uJesu kesinye isenzakalo nabo bebamapholisa. (Jwa. 7:32, 45, 46) Amapholisa nabokapteni bawo ngokukhamba kwesikhathi bathunyelwa bona bayokuthatha abafundi bakaJesu ukuthi bayokujama phambi kweSanhedrini begodu kubonakala ngasuthi ngibo abakhuphela uPowula ngaphandle kwethempeli.—IzE. 4:1-3; 5:17-27; 21:27-30.