Imozi mwa nchito zinyinji zenzosamaliliwa na ŵanthu ayakine a mtundu wa a Levi, amene enze lini a nsembe, yenze kutumikila monga apolisi pakacisi. Enzocita izi mokonkha malangizo yeenzopasiwa na woyanganila pakacisi. Wolemba mbili Waciyuda Philo, efotokoza nchito za apolisi amene aŵa, elaŵila kuti: “Ayakine mwa [a Levi] enzonkhala pa mulyango wa kacisi, ayakine enzonkhala [mkati m’kacisi] kusogolo kwa malo opatulika, kuti ŵanthu osayenelela asafwike ku malo opatulika, kaya moziŵa olo yai. Ayakine enzoyendayenda kulonda pa kacisi mzuŵa na usiku mosinthanasinthana.

Apolisi amene aŵa nthawi ziyakine enzosengewa na a khoti ya Sanhedrini. Ni apolisi tyala amene aŵa Aciyuda amene enze ololewa na Aroma.

Molingana na pulofesa Joachim Jeremias, mau a “Yesu pecizuzula ŵanthu ewela kuti amukate, ekamba kuti siku na siku nenzonkhala m’kacisi kuphunzisa koma muliyonikate. (Mat. 26:55) Zingankhale zosavuta kumvwisha kuti apolisi apakacisi niye enze etumiwa kuti amukate.” Wolemba mbili wamene uyu enzoganiza kuti ŵala etumiwa kuti akakate Yesu, panthawi iyakine zikaliyocitika izi enze soti apolisi apakacisi. (Yoh. 7:32, 45, 46) Apolisi amene aŵa na woŵayanganila wao, niye enze etumiwa kuti akakate ophunzila a Yesu noŵaleta pamenso pa khoti ya Sanhedrini, ndipo ni ove soti efumya Paulo m’kacisi.—Mac. 4:1-3; 5:17-27; 21:27-30.