Łaʼ Líívai dineʼé doo náádaʼiiłniihii danílínígíí éí kin biiʼ sohodizin bisiláo danilı̨́. Áádóó éí siláo binanitʼaʼí biyáádóó nidajilnish. Haʼátʼíísh bindaanish? Philo, Jew dineʼé naaltsoos ííłʼíní nilı̨́įgo, éí bindaanishígíí yaa chʼíhoníʼą́: “Diné kin biiʼ sohodizin góneʼ yah ahikááh, éí biniinaa łaʼ éí dáádílkał yaa ádahalyą́. Łaʼ éí hodiyingo hazʼą́ą́ góneʼ bidáahgi yaa ádahalyą́. Éí doo bá nidahazʼánígíí doo yaa ahikáah da biniyé. Łaʼ éí kin biiʼ sohodizin yinideíkááhgo yaa ádahalyą́. Éí ałnááhookahgo hadaʼasííd.”

Diné ándahaʼáii éí díí siláo nihíká anilyeed deiłní. Siláo danilínígíí tʼáá bí tʼéiyá bee naʼabaahii ndeijaah ńtʼééʼ.

Joachim Jeremias, Diyin Bizaad neiłkaahii nilı̨́įgo éí ání, Siláo éí Jesus dayiiłtsoodgo, Jesus éí kin biiʼ sohodizindi naʼnishtin yę́ędą́ą́ʼ haʼátʼíísh biniyé tʼáadoo dashoołtsood da, dííniid yę́ę (Matt. 26.55) bikʼehgo, díí kin biiʼ sohodizin bisiláo éí dabiiłtsood lá. Diyin Bizaad neiłkaahii ałdóʼ íinízingo, átséedi Jesus yah dayiiłtsood yę́ędą́ą́ʼ éí kin biiʼ sohodizin bisiláo ádaatʼı̨́ı̨́ ńtʼééʼ. (John 7:​32, 45, 46) Siláo dóó binanitʼaʼí éí diné ándahaʼáii bidáahjįʼ daalʼaadii nidahidoohʼish deidííniid. Áádóó tʼáá díí siláo shı̨́ı̨́ ałdóʼ yilʼaadii Paul kin biiʼ sohodizindę́ę́ʼ chʼídeizdzı̨́ı̨́z.—Acts 4:​1-3; 5:​17-27; 21:​27-30.