Alevi winango omwe akhali lini antsembe akhacita mabasa yanango, ninga kukhala wamphanvu zaumangi. Munembi winango wa Cidjuda wakucemeredwa Philo adafotokoza bza mabasa yomwe akulu-akulu wamphanvu zaumangi akhacita, iye adati: “Alevi Winango akhalindira misuwo yomwe wanthu akhapitira m’bwalo la templo. Winango akhalindira kutsogolo kwa mbuto yakupambulika. Iwo akhawonesesa kuti paleke kuwoneka munthu wakusaya kubvumizidwa kupita ku mbuto yakupambulikayo, ne mwa ngozi. Ndipo winango akhalindira mbuto ya templo mwakucita kuzungulira, ndipo iwo akhacita pfoti-pfoti usiku na masikati.” Iwo akhatsogoleredwa na omwe akhanyang’anira templo.

Wamphanvu zaumangiwo akhayendambo kukathandiza nyumba yakutongera mirandu. Ndipo ni gulu limweri lokha la Adjuda lomwe boma la Roma likhabvumiza kuti liphatisire basa mphanga.

Mdziwi winango wa Bibliya wakucemeredwa Joachim Jeremias adafotokoza kuti pomwe akulu-akulu wa mphanvu zaumangi adamanga Jezu, Jezuyo adawabvunza kuti thangwe ranyi iwo alibe kumumanga pomwe akhapfunzisa mu templo. (Mateu 26.55) Bzingadakhala kuti iwo akhacita lini mbali ya wamphanvu zaumangi ku templo, Jezu angadawabvunza lini. Mdziwiyo akhakhulupira kuti akulu-akulu wa mphanvu zaumangi omwe akhafuna kumanga Jezu pa nthawe inango akhali wamphanvu zaumangi wa ku templo. (Juwau 7:32, 45, 46) Na kupita kwa nthawe, nyumba yakutongera mirandu idauza mkulu wamphanvu zaumangi pabodzi na wamphanvu zaumangi winango kuti akaphate apostolo acibwera nawo ku nyumbayo. Ndipo bzikuwoneka pomwe kuti wamphanvu zaumangiwo ndiwo adakwekweta mpostolo Paulo mpaka kunja kwa templo.—Mabasa 4:1-3; 5:17-27; 21:27-30.