Bamo mwa Banyalevi aba bakali baputi babombagha imbombo isingi, bo ukubomba bo bakulumba ba bapolisi. Abene balongosiwagha na uyu alongosyagha pa tempile. Undembi wa Chiyuda uyu ingamu yake yo Philo alingenie imbombo sya balongosi, atile: “Bamo mwa Banyalevi aba bafighililagha abandu aba bingilagha mu tempile. Bamo bafighililagha ku balughu. Abene baketesyagha ukuti nayumo angingilagha kisita kwitikisiwa pamo ukwingila kisita kumanya. Bamo basyungutilagha itempile ukuti balifighilile. Bamo babombagha pakilo bamo pamusi.”

Ikhoti ilikulumba lyasumagha abalongosi aba ukuti babatule. Lyali gulu lya Bayuda bene ili lyalitikisiwe na Baroma ukubombela ifilwilo.

Ukufwana nuwakufufuza uyu ingamu yake yo Joachim Jeremias, alingenie ukuti, bo abalongosi bankolile Yesu umwene abalalusisye ukuti nongwa yafiki bakankolagha bo ikumanyisya mu tempile. Yesu akayagha pakubalalusya abalongosi linga bakali bamo mwa bapolisi ba pa tempile. (Mat. 26.55) Undembi uyu asubilagha ukuti aba batumiwe ukwakunkola Yesu bope bali bapolisi ba pa tempile. (Yoh. 7:32, 45, 46) Ukufuma apo abakulumba ba boma na balongosi babatumile ukuti bakabeghe abamanyili ba Yesu ukuti babatwale ku khoti ilikulumba kangi bali bapolisi aba balinkwabile panja untumiwa Pauli ukuti asoke mu tempile.—Imbo. 4:1-3; 5:17-27; 21:27-30.