Ɛnee Livae abusua ne anu amra mɔɔ bɛnle ɛsɔfoma la yɛ gyima bie mɔɔ ɛnɛ a anrɛɛ yɛbaha kɛ kpolisima a yɛ la. Ɛnee bɛyɛ gyima wɔ kpanyinli ne mɔɔ nea ɛzonlenlɛ sua ne azo la abo. Philo mɔɔ le Dwuu kɛlɛvolɛ la bɔ amaneɛ kɛ: “Ɛnee [Livaema] ɛhye mɔ gyinla anlenkɛ ne anloa kɛ sinzavolɛma yɛɛ bie mɔ wɔ [ɛzonlenlɛ sua ne] anu amaa bɛazi awie biala mɔɔ babɔ mɔdenle kɛ ɔyɛ ngoaseade la adenle. Bie mɔ kɔ ɛzonlenlɛsua ne anwo akpɔsa nɔɔzo nee ewiazo bɛsinza, na ɔyɛ a bɛkakyihakyi bɛ.”

Ɛnee Sanhedelin ne maa kpolisima ɛhye mɔ boa bɛ. Ɛnee Dwuu ɛzonlenlɛsua nu kpolisima ne ala a Wulomu arane ne maa bɛ adenle kɛ bɛva konle ninyɛne bɛli gyima a.

Kɛ mɔɔ abɔlɔba Joachim Jeremias hɛlɛle la, “Saa Ɛzonlenlɛsua nu kpolisima ne a le menli mɔɔ hɔle kɛ bɛkahye Gyisɛse a, ɛnee ndelebɛbo wɔ edwɛkɛ mɔɔ Gyisɛse hanle kɛ, ɛnee dahuu metɛnla ɛzonlenlɛsua ne anu mekilehile, noko bɛangye me (Mat. 26:55) la anu bɔkɔɔ.” Abɔlɔba ko ne ala die di kɛ, ɛzonlenlɛsua nu kpolisima ne a bɛzoanle bɛ wɔ mekɛ gyɛne nu kɛ bɛhɔhye Gyisɛse a. (Dwɔn 7:32, 45, 46) Nzinlii Sanhedelin ne zoanle kpolisima nee bɛ mgbanyima bie mɔ kɛ bɛhɔhye Gyisɛse ɛdoavolɛma ne bɛrɛla, na ɔbayɛ kɛ kpolisima ko ne ala a hwenle Pɔɔlo vile ɛzonlenlɛsua ne anu vindele a.​—Gyi. 4:1-3; 5:17-27; 21:27-30.