Itu i Levi ezẹko ri vwa ha usuẹn irherẹn na i vwo ewian erọrọ, jerẹ owian elọkpa. Ọrọ hẹrote oghwa ẹga na yọ yẹ aye ọkpọvi. Ọgba irherhe itu i Jew owu re se Philo, o dje kpahen oborẹ elọkpa enana e ruẹ: “Itu i [Levi] enana a dajẹ anurẹsẹ oghwa ẹga na, ezẹko a dajẹ obaro ekete ọfuanfon ra ha zẹ izobo na, aye e ruẹ ọnana neneyo ohworho owuorowu re vwe kwe riẹn, ọ jọ rhọ ruẹ uvuẹn ekete ra ha ze izobo na, sẹ ọrẹ arudọ yanghene ọsọriẹ obọ. Ezẹko a nya kinhariẹ ye te ason te uvo, nẹ aye i sabu sẹroriẹ.”

Iguẹnzọn na ina sabu ta rẹn elọkpa na ni ha userhumu rẹn aye. Aye ọvo yẹ ẹko elọkpa rẹ igọmẹti Rome i kwenu riẹn ni kpare ekwakwa owọnren.

Sekpahen oborẹ ọgba irherhe owu re se Joachim Jeremias ọ tare, “Ẹmro i Jesu ọ tare ọke re me mwuien, taghene kẹdẹkẹdẹ ọ ha uvuẹn Oghwa Ẹga na rọ yono ihworho, ọrẹn e mwuie-en (Matt. 26.55), o djephia taghene aye i ha usuẹn elọkpa oghwa ẹga na.” Ọgba irherhe na nọ ji ta taghene ihworho re dje rhe me mwu i Jesu vrẹn ne, jẹ elọkpa ri ha uvuẹn oghwa ẹga na. (John 7:32, 45, 46) A ji ta rẹn elọkpa na ọrhẹ ọduado aye nẹ aye i mwu idibo i Jesu rhiẹ obaro i Sanhedrin na, ọkezẹko aye yi tobọ kpolo ọnyikọ Paul rhiẹ otafe oghwa ẹga na.—Acts 4:1-3; 5:17-27; 21:27-30.