Tabatin hopi tarea ku levita ku no tabata saserdote tabata hasi. Algun di nan a sirbi komo ofisial di polis. E kapitan di e tèmpel tabata manda riba nan. E eskritor hudiu Filo a splika nan tarea: “Algun di nan tabata fungi komo wardadó na porta di entrada di e tèmpel. Tabatin otro ku tabata para dilanti e santuario. Nan tabata hasi sigur pa niun hende drenta e santuario intenshonalmente ni aksidentalmente. Algun tabata kana patruyá rònt di tèmpel. Nan tabata traha warda di dia i anochi.”

E kuerpo polisial ei tabata den servisio di Sanedrin. E tabata e úniko grupo hudiu ku Roma a permití karga spada.

E eksperto riba tereno di Beibel, Joachim Jeremias a splika ku ora e ofisialnan a arestá Hesus, el a puntra nan dikon nan no a arest’é ora e tabata siña hende den tèmpel. Hesus lo no a hasi e pregunta ei si e ofisialnan no tabata parti di e polis di tèmpel. (Mat. 26:55) E mesun eksperto ei ta kere ku e ofisialnan ku kier a arestá Hesus un par di tempu promé tambe tabata polis di tèmpel. (Huan 7:32, 45, 46) Despues, Sanedrin a manda e kapitan di tèmpel i algun ofisial pa trese e apòstelnan pa nan. Probablemente ta polis di tèmpel a lastra saka apòstel Pablo for di e tèmpel.—Echo. 4:1-3; 5:17-27; 21:27-30.