Mank de Leviten jeef daut soone, waut nich aus Priesta deenden. Dee hauden veschiedne Oppgowen, biejlikj deeden waut von dee em Tempel woaken. De Väaschta vom Tempel wia äwa dee aunjestalt. De judischa Jelieeda Filo schreef, waut dee äare Oabeit wia: “Eenje [von de Leviten] woakten bie de Puaten aum Engank vom Tempel, un aundre stunden [em Tempel] ver daut Heilichtum. Dee pausten doa opp, daut kjeena em Heilichtum nengonen kunn, waut no daut Jesaz no nich daut Rajcht haud. Endoont aus dee daut met Fliet deed ooda nich. Eenje wieren en Gruppen enjedeelt, soo daut dee sikj aufwakjslen kunnen. Dee jinjen Dach un Nacht rom dän Tempel un bewoakten dän.”

De judischa Huaga Rot (daut hechste judische Jerecht) kunn dise Woaka fa daut brucken, waut an fäld. Mank de Juden wieren de Tempelwajchta dee eensje, waut von de Reema de Frieheit jekjräajen hauden, Jewäaren bie sikj to droagen.

De Jelieeda Joachim Jeremias schreef: “Jesus säd to dee, waut am wullen faustnämen, daut hee eenen Dach nom aundren em Tempel jelieet haud un daut see am doa nich hauden faustjenomen (Mat. 26:55). Jesus wudd daut nich to dee jesajcht haben, wan dee nich wieren von de Tempelwajchta jewast.” Deeselwja Jelieeda denkjt, daut dee, waut Jesus ea mol sullen faustnämen, uk Tempelwajchta wieren (Joh. 7:32, 45-46). Lota schekjt de Huaga Rot dän Väaschten vom Tempel met waut Woaka toop, om Jesus siene Jinja to holen. Un woomäajlich wieren daut uk de Tempelwajchta, waut dän Apostel Paulus utem Tempel rutschlapten (Apj. 4:1-3; 5:17-27; 21:27-30).