Olketa lo tribe blo Levi wea no priest duim staka didifren waka and wanfala lo olketa waka hia hem nao for olsem police. Komanda blo olketa nao hem kapten blo temple. Wanfala man blo Jew wea nem blo hem Philo, hem raet olsem abaotem waka blo olketa policeman hia: “Samfala lo olketa [Levite] hia stap olsem security lo barava front lo olketa door, samfala insaed lo [temple area] stap barava front lo temple for mek sure dat olketa stopem eniwan wea no fit for go insaed, nomata maet man hia min for go lo there or nomoa. Samfala savve patrol raonem temple area evritaem, olketa duim shift day and naet for gardim datfala ples.”

Sanhedrin savve iusim olketa police hia for waka for olketa. Disfala grup nomoa gavman blo Rome letem olketa for karem weapon.

Wanfala savveman, Joachim Jeremias, hem storyim hao “taem Jesus tok lo olketa wea arrestim hem and sei hem bin teach lo temple for staka day bat olketa no arrestim hem nomoa (Matt. 26.55), diswan showimaot hao luk olsem olketa Temple police nao kam for arrestim hem.” Datfala sem man hem sei tu dat luk olsem olketa wea go for arrestim Jesus lo firstaem hem olketa police lo temple tu. (John 7:32, 45, 46) Gogo bihaen, olketa police hia witim kapten blo olketa nao go and tekem kam olketa disaepol blo Jesus lo Sanhedrin, and luk olsem olketa tu go kasholem aposol Paul and tekem hem aot from temple.—Acts 4:1-3; 5:17-27; 21:27-30.