Unë witsanqa, Dios Yayata adorayänampaq rurayanqan jatun wayitam templu niyaq. Tsëchöqa wakin levïta kasta ollqukunam guardia kayaq, y juk mandaqninkunam kayäpoq. Filon jutiyoq yachaq judïu nunam këta nin: “Wakinqa templuman yëkuyänan punkukunachömi täpakur shäräyaq (ichiräyaq); wakinnam sagrädu sitiuman pipis mana yëkunampaq templu rurinchö täpakuyaq; y wakinnam, sortiarnin atskaman churapanakuykur entëru templuta täpar paqaspa junaqpa puriyaq”.

Tsë llapan guardiakunam judïukunapa cortinchö trabajaq autoridäkunapa mandädunchö kayaq. Romänu autoridäkunaqa pëkunallatam armayoq puriyänanta dejayaq.

Joachim Jeremïas jutiyoq yachaq nunam këta nin: “Wanutsiyänampaq tsareqninkunataqa, templuchö yachatsikunqan witsan imanir mana prësuyanqantam Jesusqa nirqan. Templuchö täpakoq guardiakunata tsënö mana nishqa karqa, ¿pitaraq ninman karqan?” (Mat. 26:55). Juk kuti templuchö Jesusta tsarita o achkuyta munaqkunapis tsë guardiakuna kashqa kayanqantam pëqa nin (Juan 7:32, 45, 46). Apostolkuna kawayanqan witsampis, templuchö guardiakunata y mandaqnintam Jesuspa qateqninkunata judïukunapa cortinman apayänampaq niyarqan. Itsachi tsënö kaq guardiakunalla templupa amänunchö këkaqta apostol Pablutapis prësuyarqan (Hëch. 4:1-3; 5:17-27; 21:27-30).